The Project Gutenberg ebook of L'amant rendu cordelier a l'observance d'amours, by Martial d'Auvergne.

Au son d'un bastouer cliquant
D'une tresbelle chamberiere
Sa voix singlant et decliquant
Ainsy que une seraine clere
En ung pré joingnant la riviere
M'endormis si soudainement
Que perdis propos et lumiere
Et ne sçay que devins vraiement

Sy me sembla q'un grant boullon
D'eaue me ravit et surmonta
puis survint ung estourbillon
De vent qui se doux chant m'osta
Et d'illec sy me transporta
Aussy viste comme ung canon
A ung grant boys ou m'emporta
Maugré moy voulsisse ou non

Le boys ou forest s'appelloit
La forest de desesperance
Ou jamais homme sy n'alloit
Qui ne fust marry a oultrance
Mains vaillans les fers de leur lance
y ont en combatant laissés
Mains amoureux en desplaisance
Par couroux y sont trespassés

En maintes foretz ay esté
Mais oncques n'en veis l'apareil
Car soit en yver ou esté
L'on n'y voit luire le soleil
Le temps n'y est pers ne vermeil
Tousjours y fait obscur et noir
Ne n'a que tristesse et que dueil
S'estoit verdier de desespoir

Quant je me veis en ce dangier
Lors je commencé a crier
Vers amours pour me solaiger
Et obvier au fourvoier
Priant qu'il me voulsist convoier
A ce perilleux damne pas
Car sans son secour envoier
Seur estoie de passer le pas

Sy n'euz pas mon oraison faicte
Qu'amours de sa grace et bonté
Sy me transmist une saiecte
Ardant et plaine de clarté
Qui me mist au chemin hanté
Dont de loing veis une chapelle
Vers laquelle me transporté
Jamais n'en eschapé plus belle

Ainsy pour amours mercier
Vers ceste eglise hastivement
Prins pays sans me soucier
Comme delivré de tourment
Et cheminay sy longuement
Que j'arrivay devant la porte
Qui estoit de grant exaussement
Et d'ouvraige de mainte sorte

Ceste eglise faicte a pilliers
De merveilleuse magnificence
Fondee estoit de cordeliers
Religieux de l'observance
Ayans renoncé l'aliance
Du noble service d'amours
Pour faire leens penitance
Jusques a la fin de leurs jours

Or sur ce point est a noter
Que de tous vivans langoureux
L'on eust leens souffert bouter
Sy non les loyaux doloreux
Les despourveux adventureux
Les desolés et espanis
Mesmement povres amoureux
Qui de leurs dames sont banis

De la nef du cueur du portal
Ne sauroye au long toucher
Tous les murs estoient de cristal
Tous lambroussez jusques au clochier
De fin or et d'azur mout chier
Et la croisee toute d'ivire
Brief qui vouldroit tout espluchier
Il faudroit ung jour a le dire

Sy veis en entrant a l'eglise
Ung povre amant plourer sy fort
Portant le noir et sans devise
Comme tout plain de desconfort
Triste estoit lors jusques a la mort
Com s'il vouloit pencer de l'ame
Et disoit l'en leens qu'atort
L'on l'avoit bany de sa dame

Le gallant avoit pour habit
Longue robe noire dessainte
Comme pour estre a ung obit
Cornette de beau veloux tainte
En couleur de reffus et plainte
Cheveulx longs du temps des apostres
Et puis par devocion sainte
Portoit les belles patenostres

Quant je me fus agenoullé
Et que euz commencé ma priere
De cet homme me esmerveillé
Qui menoit sy piteuse chiere
Car a ung lieu n'arestoit guere
Ains alloit tousjours et venoit
Et sembloit bien a sa maniere
Que du monde ne luy challoit

En me pourmenant de travers
De la nef et a l'opposite
Ung des religieux convers
Vint donner a tous l'eau beniste
Puis que la grant messe fut dicte
Je veis la venir damp procureur
Portant ung visage d'ermite
Qui fist a l'amant grant honneur

Or ça dist il j'ay parlé
Au jour duy de vostre matiere
Mais damp prieur s'en est allé
Sy près il n'arrestera gueres
Je vous asseure qui n'y a frere
Ceans qui ne vous aime bien
Pour quoy devés faire grant chiere
Car vostre besongne ira bien

Lors dist l'amant la leur mercy
De mon cas sont mal informés
Las je n'ay fait ailleurs ne sy
Chose dont doye d'eux estre amez
Mes biens fais sy sont clers semez
De moy ne leur en doibt challoir
Quant les auroy acoustumés
Je n'emporray que mieulx valloir

Tantost après cy arriva
Damp prieur venant de dehors
Auquel damp procureur luy va
Presenter le povre amant lors
Disant pere misericors
En vecy ung qui fain a de rendre
A l'ordre le cueur et le corps
Se c'est vostre gré de le prendre

Premierement il fault sçavoir
Dist damp prieur sa voulenté
Et s'il pourra bien recepvoir
Tant de tourment et de durté
Il n'y a leans que povreté
Amy je le vous vueil bien dire
Affin que sy y estes bouté
Vous prenés en gré le martire

Helas dist il ne m'en chault
Eslire vueil la voye certaine
J'ay essayé du froit et du chault
Et sçay que ceste vie mondaine
Est fainte deceptive et vaine
Faisans cent mille gens perir
Qui plus y est plus a de peine
Et sy fault une foys mourir

Or ça mon amy qui vous meult
Dont vous vient ceste affection
L'ennemy tressouvent esmeut
Maintes gens par temptacion
Soubz umbre de devocion
Pour faire ung coup a l'aventure
Et entrer en profection
Dont après ilz maudissent l'eure

A par ma foy je vous diray
La chose ne m'est pas subite
Car j'ay pieça deliberé
De mourir reclus ou hermite
Les biens d'amours je les vous quicte
Mes ris sont tournés a plourer
En lieu ou tout plaisir habite
Je ne quiers jamais demourer

Comment vous qui estez sy jeune
Avés vous le cueur tant failly
Qui ne vous chault de vie mondaine
Hault desir est il aboly
Avés vous regart a nulluy
Vous a l'en rien dit ou meffait
Amours vous ont il defailly
Qui ceste maladie vous fait

Ma maladie la ne gist point
Ne n'ay regret a homme ne a femme
Remors de conscience me point
Seulement a pencer de l'ame
Car a poursuir grace de dame
Trop y fault de pas et de tours
Et sy n'en puet on avoir dragme
Qui ne couste mille douleurs

Telles douleurs ne sont que joye
A gens qui les scevent contendre
Et viennent de la la mont joye
D'onneur qu'on ne sauroit comprendre
Biens d'amours ne se pevent trop vendre
Car c'est en tout temps heritaige
Qu'on ne peut perdre ne despendre
Et sy rend tousjours davantaige

Le dire ne vous couste gueres
Je sçay bien comment il m'en tient
De tant que ma plaisance est chiere
Voirement plus peine apartient
Mais quant tousjours on la soustient
En vivant soubz une esperance
D'aquerir loier qu'on retient
C'est la pour perdre pascience

Dames ne sont point tant cruelles
Ne sy despourveues de savoir
Que de ceulx qui seuffrent pour elles
Elles n'en facent leur devoir
Mais sy n'y veulent pourvoir
L'on ne les en doibt point blasmer
Legier croire fait decevoir
Il fault congnoistre avant que amer

Que peut on mieulx homme congnoistre
Que par service et diligence
Quant on le voit nuyt et jour estre
Atendant d'amours l'influence
Muer couleur et contenance
Suer trembler et soupirer
Helas c'est bien l'experience
Qui la vouldroit considerer

De telz maulz nulz n'est tant malade
Qu'on ne face bien tost guerir
D'un baiser ou d'une balade
Quant amour le veult secourir
Tel se plaint avant que ferir
Qui n'a douleur ne maladie
Ne n'en voit l'en gueres mourir
Quelque chose que n'en me die

Ha monseigneur vous avés tort
Vous sçavés mieulx que vous ne dictez
Car plus vauldroit souffrir la mort
Que telles douleurs etroclites
Se sont angoisses cy despites
Qui font le sens perdre et tourner
Aumoins ceulx la en seront quictes
Ne n'y faudroit plus retourner

Or je vous demande beau sire
Se la dame ou estoies submis
Vous a brassé sy dure martire
Que secours n'y puisse estre mis
y avoit il nulz compromis
Entre vous deux et alliance
Ou celle avoit nulz autres amys
Qui vous aient fait bailler l'avance

Doubter point ne fault de cela
Tant estoit parfaicte et entiere
Pour ce maintenir ça et la
Fust en langaige et en maniere
D'onneur estoit la tresoriere
Belle et bonne sans quelque chose
A chascun faisoit bonne chiere
Mais ne m'y demandés autre chose

De dire que n'y trouvés point
Ung peu plus qu'autre d'avantaige
Je ne puis concevoir ce point
Ne qu'elle eust sy gros couraige
De vous veoir endurer dommaige
En la servant et pour bien faire
Veu qu'elle estoit sy bonne et sage
Aussy je ne le sauroye croire

Le bien et le mal congnoissoit
Jamais n'en sera de pareille
Dieu luy doint bon jour ou qu'elle soit
Et a tous ceulx de sa sequelle
Quant j'oys encor parler d'elle
Les larmes m'en viennent es yeux
Et ma doleur s'en renouvelle
Dont il ne m'en est pas de mieulx

Elle et aultre fault oublier
Folie est de s'y amordre
Aumoins se vous y voulés lier
Et garder les veux de nostre ordre
Du temps passé vous faudroit tordre
Les mains et avoir repentailles
Sy notés bien ces motz par ordre
Car se n'est pas jeu de troys mailles

Helas c'estoit la plus prudente
Que je veis onc et plus parfaicte
Saige savant d'onneur plaisante
En bonté et beauté complecte
De tous biens brief estoit replecte
Il n'y falloit metre n'oster
Quant il m'en souvient je souhaite
La mort que me viengne emporter

En ung propos n'estes pas ferme
En ce que puis apercevoir
Ne n'est pas le chemin de l'ame
De vos amours ramentevoir
Il vous en fault tout demouvoir
Et ung autre leçon aprendre
Avant qu'on vous puist recevoir
En la religion ne prendre

Si forte rigle que vouldrés
Bien garderé pour abriger
Et me sembloit que quant saurés
Qui me fait mon mal rengregier
Vous aiderés a deschargier
Mon povre cueur de grant mesaise
Mais j'ay paour de vous trop charger
Et que mon langaige desplaise

Nenny vous serés escouté
Dire me povés hardiment
Cy soubz le benedicité
Vostre vouloir et pensement
Aussy avons exprès serment
De ne prendre ceans personne
S'il ne desclere entierement
La cause pour quoy il s'i donne

Vray est que fu jadis esprins
Par le mouvement de desir
De ceste dame de hault pris
Se s'eust esté son bon plaisir
Ou failly n'avoye a choisir
De en sa grace me hebergier
Mais dangier m'en vint dessaisir
Qui me fist bien tost deslogier

Dangier sy a ceste coustume
D'effroier tousjours la poulaille
Il destaint le feu et l'alume
Il trenche les morceaux et baille
L'un rançonne l'autre tenaille
Il en prent par ou il en treuve
On n'a point telz biens sans bataille
Mais il ne fault pas qu'on recouvre

Las je ne sçay quel recouvrer
Il vault mieux plus tost departir
Que trop attendre et pis trouver
Et retraire que repentir
Brief c'est pour devenir martir
Qui a entre ses mains affaire
Car quant on cuide bien departir
Lors c'est quant est a reffaire

De dangier ne se doibt l'en plaindre
Car amour sy l'a destiné
Pour reprouver et pour refraindre
Le feu de desir obstiné
Bien aux dames fut ordonné
Pour en avoir la garde et umbre
Car tout seroit habandonné
Et en vendroit des maulx sans nombre

Non feroit ja sans vostre grace
Dames ne sont point sy volaiges
Que cy tost et de prime face
Pour ung peu de plaisant langaige
Elles declerent leur couraige
Sans savoir a qui ne comment
Aussy raison qui est leur gaige
Ne le souffreoit aucunement

Raison est souvent endormie
Mais jamais dangier ne sommeille
Ne ne dort heure ne demie
Tousjours a la puce en l'oreille
Il court il suyt il traveille
Pour guerroier jeunes et vieux
Il est bon mestier qu'on y veille
On ne demanderoit pas mieulx

Puis male bouche et faulx parlant
M'ont grevé tant qu'on seroit dire
Sans ce que j'en aye fait semblant
Cuidant qui se deussent reduire
Ou apaiser ung peu leur yre
Mais plus y pert qui plus leur donne
Car elles m'en ont voulu plus nuyre
Mais maintenant je leur pardonne

C'est bien dit nous devons benistre
ceulx mesmes qui nous font les motz
Et avons expresse epistre
Se me semble ad corintheos
Se vous estes misericors
Dist dieu je le vous seray
Combien que de tous durs effors
Ne sembloit pas tout empiray

Je n'ay membre qui ne s'en sente
Il m'en puet assez souvenir
Et tel souvent cy rit et chante
qui est dolent jusqu'au finir
Je m'en sçay bien a quoy tenir
Et sy n'y puis secours donner
Ains m'en fault des maulx soustenir
Dont ne fais pas les sains sonner

Quant vous enduriés telle peine
Que n'alliés vous devers la belle
Dire vostre raige inhumaine
Et impetrer la grace d'elle
Je crois qu'eussiés eu nouvelle
Opportune pour vous guerir
Car dame n'est point sy cruelle
Que nul vueille faire mourir

Il ne tenoit point a bailer
Mais je n'y povoye radrecer
Car dangier gardoit le parler
Et malle bouche le passer
Ainsi vous failloit traverser
Entre deux par emblee ou fuyte
Sy m'esbahis a y pencer
Que mort ne suis a la poursuite

Or sire quant vous y alliés
y trouviés vous n'avant n'arriere
Chose de dont vous esbayssiés
Ou deussiés faire bonne chiere
Estoit elle point coustumiere
De jecter ung doux regart
Ou se par ris ou par maniere
En passant vous disoit dieu gart

Je ne passoye point cy avant
Ains a l'uys troys heures entieres
De nuyt estoye soubz ung au vant
Regardant en hault les goutieres
Et puis quant je oye les verriers
De la maison qui cliquetoient
Lors me sembloit que mes prieres
Exaussees d'elles sy estoient

Estiés vous seulement content
De telles plaisances mondaines
Et d'illec demourer tant
Escouter lever les avoynes
Vous jecte l'en point marjolaines
Quand on les venoit abruver
Ou saviés enseignes certaines
qu'elle vous puest bien aviser

Se m'aist dieu j'estoye tant ravis
Que ne savoye mon sens ne estre
Car sans parler m'estoit advis
Que le vent ventoit sa fenestre
Et que m'avoit bien peu congnoistre
En disant tout bas doint bonne nuyt
Et dieu scet se j'estoye grant maistre
Après cela toute la nuyt

Puis que vous ne la veyés mye
Cause n'aviez d'estre joyeux
Car estoit puet estre endormie
Quant ainsy vous riés aux cieux
Auffort vous rapaisiés vos yeux
Des fenestres ou des violiers
Et vous profitoit cela mieux
Que d'avoir escuz a milliers

Ce soir dormis plus seurement
Que par avant n'avoye dix jours
Tant sentoie grant allegement
D'ainsi avoir veu mes amours
Sy faisoye lors mout de clamours
Au lieu en merciant la belle
Du confort et joyeux secours
Que j'avoye eu au moyen d'elle

Or sire par ce seur dormir
Que tenez de cy grant valeur
Sentiés vous point le cueur fremir
Et entrer en froit ou challeur
Vous sembloit le repos meilleur
Que n'aviez dont acoustumé
Ou se de joye ou de douleur
Estiés point transi ou pasmé

Tellement estoie restauré
Que sans tourner ne travailler
Je faisoie ung somme doré
Sans point la nuyt me resveiller
Et puis avant que m'abiller
Pour en rendre a amours louenge
Baisoie troys foys mon orillier
En riant a par moy aux anges

Du temps que ceste nuyt duroit
La songiés vous point nullement
Ou se vostre oeil la desiroit
Point veoir illec visiblement
Car de tel mondain pensement
Adviennent maintes frenaisies
Qu'on cuide estre vrays proprement
Et sy ne sont que fantasies

Bien souventesfois advenoit
Que voirement je la songoie
Toute telle joye sy me prenoit
Que au lit chantoie et pleuroye
Puis moy resveillé j'enragoye
Que ne la veoie illec
Et maintesfoys place changoye
En faisant des piés le chevet

Or ça quant vous estiez levé
Que faisiés vous toute journee
Aviez vous nul amy privé
Qui sceust rien de vostre trainee
Ou salliés point la matinee
Passer devant la dame ung tour
pour avoir ung regard d'emblee
Ou ung doux sourris au retour

Soyes seur que pas n'y failloye
Ainçoys vestu d'estrange sorte
Des le fin matin y alloye
Atout une nouvelle cote
Puis se la veoie a la porte
M'en alloye tant desconforté
Que ce ma vie eust esté morte
Si fust mon corps resuscité

N'aviés vous lors par divise
Sur vostre habit quelque verdure
Ou ung cueur emprès la chemise
Ou son nom fut en escripture
Ceulx qui sont en telle adventure
Ilz ont bon temps dieu le leur sauve
Car ilz pevent porter a tout heure
Pourpoint vert et la bote fauve

De telz biens ne failloit douter
Tout y voloit par escuelles
Et eussiés veu fanges sauter
Chevaulx abatre estaux et selles
Puis faire toutes choses nouvelles
Dont l'en se pourroit adviser
Car qui a telz picquans es oreilles
Il n'a garde de reposer

Qui ce pendant pensoit du vivre
Et de vostre estat soustenir
Veu qu'on ne peut pas tousjours suivre
telz boubans ne les maintenir
Je croys bien que pour parvenir
A congnoissance il en fault faire
Mais du sien fait bon retenir
L'on ne scet qu'on en a affaire

D'or d'argent de vie ne de rente
A lors bien peu m'en souvenoit
Ung escu m'en rendoit trente
Fortune pour moy lors regnoie
Chascun d'autre part me donnoit
Et estoie plain jusqu'au menton
Par quoy qui en avoit on prenoit
Ne me challoit pas d'un bouton

D'estre ainsy fiché en ung lieu
pas n'aviés le cueur en franchise
Helas pensiés vous point a dieu
Je croy que non ne a l'eglise
Ains aviés curiosité mise
Tant a celle qu'aimiés tant chier
Que fait n'eussiez que a vostre guise
L'en vous en eust eu beau prescher

A suivre l'eglise comment
Sy estoit ma personne duite
Pour estre des premiers devant
A luy bailer de l'eau beniste
Puis celle faisoit la petite
Ou qu'elle me gectast ung doux yeux
J'estoie lors de joye subite
transsi et ravi jusqu'au cieux

Or ça sire durant la messe
Vous alliés vous point pourmener
Devant la place ou la deesse
Si devoit son corps sejourner
Et quant venoit au destourner
Cliquetiés vous point le patin
Affin que l'ueil voulsist tourner
Pour entendre vostre latin

Tousjours d'elle me tenoye près
Affin que luy peusse porter
La paix pour l'apaiser après
Qu'on n'avoit garde de m'oster
Puis a genoux m'aloye bouter
Aidant au prestre anemen
Vous m'eussiés ouy chanter
Pour deo gratias amen

Les povres qui queroient l'aumosne
Partoient ilz de vous escondis
Euvre de charité estoit bonne
Pour gaigner y la paradis
Combien qu'en ce temps jadis
N'en estiés gueres en talenté
Car vostre entendement tout dis
Sy estoit bien ailleurs bouté

Se au montier baisoye saint ou sainte
Je l'aloye baisier après elle
De bon cueur par force ou contrainte
Et dieu soit se je l'avoye belle
Je luy alumoye sa chandelle
Et puis m'en alloye après
Chascun povre avoit sa merelle
Pource qu'elle estoit au plus près

Quel devocieux ypocrite
Qui faisiés semblant de menger
Les crucefix et estre hermite
A bien vostre maintien juger
Besoing n'aviés que de dangier
Qui fust venu de la maison
Pour vous aider a heberger
Vostre priere et oraison

Quant il m'eust veu agenouiller
Doubté ne s'en fust nullement
Car me tenoye contre ung pillier
priant la dieu devotement
Mes yeux estoient au firmament
Et mes mains es cieux renversees
Mais croiés qu'en se mouvement
Avoye maintes menues pensees

Or beau sire je vous demande
Quant vostre dame d'aventure
Jectoit en allant a l'offrende
Sur ung autre sa regardure
En monstrant que de vous n'eut cure
Qu'elle chose pensiez vous adoncques
Eussiés vous point voullu a l'eure
Avoir au montier autre oncques

Par foy point n'arrestoye en place
Ains estoie de mal et de peine
Chault comme feu froit comme glace
Souppirant a la grosse allaine
Lors tensoie a ma poullaine
Mes dois et cheveux tiroye
Et s'avoye fleurs et marjolaines
Par despit je les deschiroye

Dea vous ne m'avés pas compté
Des nopces faictes ou regard
Et en ce joyeux temps d'esté
Qu'on doibt bailler la coste verd
Ne vous trouvés vous point a l'escart
Pour faire la quelque entreprise
Abatre a terre ung huys ouvert
Ou d'autres biens dont l'en s'avise

Pencés monseigneur le prieur
Que de telz biens rien n'oublioie
Ains tousjours loyal serviteur
En tous lieux monstrer le vouloye
Se aux nopces estoit je y alloye
Pour la servir illec auprés
N'a mettre pas je n'y failloye
Le coteret dessus ses piés

Voire mais quant male bouche
ysaygrin fait semblant dangier
Vous assembloit par escarmouche
Pour vous de la dame estrangier
Ou alliez vous vostre frain rongier
Ne que poyez vous faire après
Veu qu'il failloit place changer
S'ilz vouloient poursuivre de près

Quant d'un tel tour m'avoit joué
Communement je me mectoie
Derriere ung vueil tapis troué
Par my le quel ung oeil boutoye
Et la feste la escoutoye
Regardant d'elle le maintien
Puis quant elle vers moy sentoye
Et cela me faisoit grant bien

Sur ma foy vous estiez bien aise
Puis quant venoit au chapellet
Qu'est une dance que l'on baise
Que voiés ung demoiselet
Prenant pour vous le morcelet
Et qu'elle luy faisoit grant feste
Vous trouviés vous point chaudelet
Ayant les fievres en la teste

A lors sans dire ha ne sy
Partoye d'illec malcontent
Demy pasmé demy transsy
Fantasiant et barbetant
A mon umbre alloye combatant
J'estoie le prestre et martin
Car je respondoye en chantant
Et parloye françoys et latin

Or sire ne juriés vous pas
Que pour rien qu'on vous sceust donner
Ne feriés vers elle ung seul pas
En vous voulant determiner
D'elle et du tout habandonner
Et neantmoins le veu parfait
Estiés vous prest de retourner
Que jamais devant n'aviés fait

D'aller ne m'eusse seu tenir
Pour l'esperance que j'avoye
De quelque confort obtenir
Sy devant son huys la veoye
Mais en passant souvent trouvoye
En lieu d'elle la chamberiere
Dont a peine que ne desvoie
Et perdes tout sens et maniere

De l'une a l'autre resembler
y avoit grande difference
Jaçoit ce que pour tant troubler
Ne deviés n'avoir desplaisance
Or après ceste diligence
Qu'il failloit repaistre ung petit
Mengiés vous saulce vert ou jaune
Pour trouver meilleur appetit

A table tout trouvoye amer
Et ainsy en lieu de menger
Lors entroie en haulte mer
Et ne savoye que forger
Mon esbat estoit de songer
Ou de froter mes paupieres
Et puis pour mon mal alleger
Faisoye des croix aux sallieres

N'aviés vous ailleurs ou jouer
Ne prendre vostre esbatement
Jectiés vous vostre trenchouer
Point par despit ou vengement
Mengiés vous tost ou bellement
Je croy que n'y preniés point garde
Ou quelle viande nullement
Goust n'aviés tant estiés malade

Illec point je ne demouroye
Car les napes cy me soulloient
Et la mort souvent desiroye
Les gens m'ennuyoient qui parloient
Les oyseaux mesmes qui voloient
Sy me faisoient mal en la teste
Jeux ny esbas rien n'y valoient
Car tout me tournoit a tempeste

C'est a vous trop fait d'exés
Pour une plaisance mondaine
Car de la viennent les assés
De double fievre traversaine
L'en court l'en fuit l'en se demaine
Puys on a froit puis on a chault
Brief les amans ont assez peine
Et sy a personne n'en chault

Helas monseigneur le prieur
Il ne vous couste gueres a dire
Mais ceulx qui ont sentu la doleur
S'en scevent bien tenir de rire
Au monde n'en est point de pire
Ne de sy terrible tourment
Car c'est ung fer et ung martire
Qui n'a fin ne commencement

Il y a ceans religieux
Qui a autant de mal essayé
Que vous avés et cent foys mielx
Sans ce qu'il ait gueres crié
Autres que vous y ont froié
Et enduré plus forte chose
Faire n'en fault tant l'effraié
Car telz douleurs ne sont que rose

Rose sire bon gré saint george
Il n'y a point comparaison
Car qui auroit boce en la gorge
L'en auroit plus tost guerison
Que d'une telle traison
Qui perce les os jusque aux anches
Il n'y a rime ne raison
Quant on a telles fievres blanches

La fievre cy grant ne puet estre
Que cy d'aventure la belle
Cy vient de nuyt a la fenestre
Voit le povre gallant qui veille
Et qui a la puce en l'oreille
Qu'il ne soit sur piés guery
D'un brin de girofle vermeille
Celle luy jecte tant soit marry

Je croy bien que le mal apaise
Ung petit quant le bien luy vient
Mais ceste joye cy tourne en noise
Sy le lendemain il advient
Q'un autre compaignon survient
A qui l'en face belle venue
Et que de la fievre revient
Qui double en fievre continue

Il n'y a remede soudain
Que faire bouter les destriers
Et mener tart sur le serain
Tabourins herpes menesteriés
Pour esveiller leur arglentier
Et les esperis de dormir
Illec se monstrent cueurs entiers
L'en a point telz biens pour gemir

Dormir sire las l'on a garde
Mais d'aller ainsy aveuglectes
L'on chiet qu'on ne s'en donne garde
Sus ung seul plain de perrettes
Ou l'en rond la ses esguillettes
Prenés qu'il y ait grant dangier
Pour les limons de ses charettes
Et les tronches des boulengiers

Quant on va de nuyt par les rues
Et l'on n'ose clarté porter
Il se fault garder par les nues
Qu'on voit au ciel courre et troter
Et les estaux qu'on deust tater
En tenant la main a l'esguet
Sans l'uys de la dame hurter
Car il y a dangier pour le guet

A monseigneur vous appliqués
Le mal en autre entendement
Et me semble que vous moqués
Ou que ce soit esbatement
Qu'on passe ainsi legierement
Mais quant a moy point ne m'en loue
Car l'en treuve assez largement
D'autres esbas ou mieulx l'en se joue

Vous vous plainiés de saine teste
Et avés pensees trop legieres
Quelx troux avés vous en la teste
De porter harnoys et banieres
Couchates vous onc aux goutieres
En caves ou en souppiraux
En eschellant huys et verrieres
Car de la viennent les grans maulx

En plus grant dangier la moytié
Me suis trouvé et dur passaige
Sans ce que on ait eu pitié
Ne fait ung seul bien d'avantaige
Brief se eusse sceu le pellerinaige
Dont remede me fust venu
Pour obvier a telle raige
Je y eusse esté avant tout nu

Gueres n'y sere le pelleriner
ains tousjours les doleurs s'entretiennent
L'on puet tant qu'on veult cheminer
Ceulx qui s'en vont après reviennent
Car il fault que secours obtiennent
De celle qui navré les a
Ce sont canes qui vont et viennent
A qui en prend bien il en a

J'en ay esté a tel destroit
Que ne savoye ma contenance
Ne se estoit court large ou estroit
Autant mestoit dueil que plaisance
Je mectoye du vin en ma pance
En gratant souvent mes cheveux
Et puis escripvoye esperance
Contre ung mur en dueil angoisseux

Ne reposiés vous grain ne goute
Je croy que non sy m'aist dieux
Ains renunsiés draps lis coute
A terre le plus et le mieulx
Car ne trouviés place ne lieux
Pour dormir endroit ou envers
Ne qui eust gardé vos yeux
D'estre toute la nuyt ouvers

Les heures de la nuyt comptoye
Sans reposer ne sommeiller
Et aux guerres tant me boutoye
Que me trouvoye chevalier
Et tençoye a mon orillier
Et faisoye chasteaux en espaigne
Puys avoye a mon resveillier
Belles estuves d'alemaigne

Se vostre dame eust sceu ou veu
De vos aspres maulx la moitié
Je croy moy qu'elle y eust pourveu
Tout empeschement rejecté
Car il n'est cueur qui n'eust pitié
De veoir endurer tel tourment
A vous n'ay couroux n'amoitié
Mais sy m'en fait il mal vrayement

Helas d'elle ne me plain mye
Ains m'en loueray a tousjors mais
La tien ma dame et m'amye
Sans ce que je l'oublie jamais
Aussy de mon mal ne puet mais
Se fait male bouche et dangier
Qui m'ont par ung dur entremais
De sa grace fait estrangier

En vous est failly esperance
Et vous tiens de lache couraige
Car se brief faisiés diligence
Vers amours qui est doulx et large
Il vous eust rendu d'avantaige
Cent foys plus que n'avés perdu
Et pource se faictes que saige
Yrés a elle a bras tendu

J'en ay fait tout ce qui fault faire
Mais tout ce n'y a riens valu
Car ces gens la pour me deffaire
Ont mon bien et honneur tolu
En faisant comme ilz ont voulu
Tourner a leur poste le vent
Encore quant m'en suis dolu
L'on m'a fait pis que par devant

Toutesfoys sy a il justice
Bien gardee sur le fait d'amours
Et y regne bonne police
Comme vous sçavez tous les jours
Je croy bien qu'il vient des doulours
Ou l'en n'y puet remedier
Mais venus qui oit les clamours
Y pourvoit qui l'en veult prier

Jamais n'en vueil nul requerir
De cela soyés tout conclus
Ains mon entente est de mourir
Ceans cordelier et reclus
Tout espoir est de moy exclus
Vienne la mort quant elle vouldra
Du temps passé ne m'en chault plus
Je suis prest quant a dieu plaira

Heelas povre malheureux
Tu perdras icy ta jeunesse
Et tous les biens adventureux
Dont amans viennent a richesse
L'ostel est fondé de tristesse
Regarde ou tu te veux bouter
Se le fais dy adieu leesse
Et sy ne t'en pourras oster

Ja pour vostre dure responce
Mon cueur ne s'en esbahira
Quant aux biens d'amours je y renonce
Prenne chascun ce qu'il vouldra
Ma vie en desert finera
Car il m'ennuye ja au monde
Ne mon vouloir n'en changera
Pour quelque personne qui gronde

Le fort n'est pas la voulenté
Ainçois a la vertu que aurés
Et sachés que serés tempté
Par mains assaux que recevrés
Peine et misere trouverés
En lieu de joye et de plaisance
Quand vouldrés menger junerés
Qui est tresdure penitance

S'il plaist a dieu il m'aidera
A endurer et supporter
La peine ja ne desmouvera
Mon cueur de son vouloir oster
Et pour la verité compter
Je fait veu des long temps d'y estre
Et avoye fain de my bouter
Des l'aage que me puys congnoistre

C'est grant chose que de promesse
Et d'y avoir devocion
Mais se vous saviés la detresse
Qu'on y seuffre et l'afliction
Vous mueriés vostre intention
Qui est sy ferme a demourer
Aussy vostre complection
Sy ne le pourroit endurer

Vous le dictes pour m'esprouver
Veu que assés savés le contraire
Et sy sauriés reprouver
Tant l'ordre qu'on m'en peust retraire
L'on m'en a beau crier et braire
Ce qu'ay promis je vueil tenir
Ne n'entens prendre autre repaire
Vienne qui en pourra venir

Comment vous qui avés gouté
Tant d'onneur au monde et de gloire
Prendriés vous yver pour esté
Et en lieu de bon temps misere
Il vous fauldra porter la haire
Aller nudz piez sur les espines
Juner plourer veiller et braire
Sans faillir nul jour a matines

Tort avés ung petit beau sire
De vous en chagriner sy fort
Attendu qu'il n'y a ceans frere
Qu'il gueres soit de moy plus fort
Pas n'y viens par joyeux confort
Ains pour mener vie solitaire
Pour quoy sy ne vient plus auffort
Je sçay bien ou me dois retraire

La difficulté n'est point la
Ains a ce que vos gens diront
Qui ont port faveur ça et la
Croiés que malcontens seront
Ne que a grant peine feront
Vous rendre sy a tousjours mais
Et sy contre nous murmuroient
Jaçoit ce que n'en povons mais

Qui en religion se boute
Parens ne amis ne doibt croire
N'au contraire les ouyr goute
S'il ne se veult perdre et deffaire
A veux premier fault satisfaire
Leurs cas pas ne me sauveront
Chascun doit pencer de bien faire
S'ilz en crient ilz s'appaiseront

Or voige bien que pour parolle
Ne pour rien qu'on vous sceust prescher
Ne vous osteriés de la cole
Ou vostre cueur se vuet ficher
De quoy je vous ayme plus chier
Beaucoup de vraye amour formant
Et tant que pour vous despecher
Je m'en voys parler au couvent

Ainsi damp prieur s'en alla
Le tymbre et les freres sonner
Puis bien avant sy leur parla
Comment venoit de sermonner
Cest amant qui vouloit donner
Leans cueur corps et tout le sien
Pour ses derniers jours finer
En leur en disant mout de bien

Si que par son tresgrant raport
Les freres estans en chapitre
En furent contrains et d'acord
Et le commencerent a benistre
Et a dire pour son bon tiltre
Des biens une grant legion
Esperant grand prouffit en ystre
Pour toute la religion

Ce fait damp prieur retourna
Pour les nouvelles tost luy dire
Et en l'appellant s'enclina
En commençant a luy souzrire
J'ay bien besongnié pour vous sire
Le couvent sy vous recevera
A l'ordre sans y contredire
Venés y quant il vous plaira

Quant m'a esté enchargié
De vous exposer et compter
Que nostre hostel est tant chargié
De gens qu'il n'en peult plus porter
L'en ne saura mais ou bouter
Tout est plain de freres dieu grace
Mais s'on en devoit hors jecter
Sy aurés vous logis et place

Aussy plus pour estre certain
De ce que a besongner aurés
Vecy damp dueil le secretain
A qui vous en conseillerés
Aussy souvent vous esbatrés
A lire en ce petit livret
Ou nostre rigle treuverés
Et comment l'en doit sieans vivre

Voulentiers dist il monseigneur
Se dieu plaist j'en feroy devoir
Et vous remercie de lonneur
Que vous a pleu me faire avoir
A moy n'a pas tant de savoir
Que je le sceusse bien comprendre
Mais dieu qui chascun fait pourvoir
le vous vueille en sa gloire rendre

Ainsy cest amant fut logié
Et faisoit liberallement
Ce qui luy estoit enchargié
Dont tous l'amoient entierement
Cy endura lors grand tourment
Car a l'entree paye on la disme
Mais tout portoit paciamment
Sans en faire semblant ne sisme

Toutesfoys a une journee
Du prin temps qu'on dit sur l'erbette
Damp prieur vers l'après disnee
Sy trouva a sa saincturette
iii ou iiii brins de violette
qu'il portoit pour seignier ses heures
Dont grant cririe fut lors faicte
En le ramenant bien des mures

Cy fut le povre homme effrité
Je vous assure et bien esprins
Combien qu'a dire verité
Il n'avoit pas trop fort mesprins
Car pensés qu'il avoit aprins
A porter boucqués et sentir
La les plus rouges y sont prins
Ne ne puet bonne amour mentir

Quant a ung soir bien sur le tart
On faisoit visitacion
En allant fut prins a l'escart
Au pré de recreation
Ou la pour consolacion
Sy faisoit bien les espernades
En lisant par devocion
Ung livre tout plain de ballades

Cella sceu la cloche en sonna
Pour tous les freres assembler
Dont en soy bien l'imagina
Commençant tresfort a trembler
Mais il ne se povoit embler
Par quoy vint prendre discipline
En confessant sans soy troubler
Estre de pugnicion digne

Oncques puis au train ne tourna
Ains fist merveilles de bien vivre
Et brief sy belle vie mena
Que nul ne le pourroit consuivre
Et qu'après ce qu'il fut delivre
Du temps qu'on doit porter le fais
L'en le vint prier et poursuivre
De vestir et d'estre proffais

De ce fut content et joyeux
Comme sil qui le desiroit
Mais pour faire la chose mielx
Il dist bien que il rescriproit
A ses parens et manderoit
Le jour prins a faire la feste
Affin d'y venir qui vouldroit
Sans leur en faire autre requeste

Quant ilz en sceurent les nouvelles
Chascun d'entre eux fut tost monté
Et y eut dames damoiselles
Estranges et de parenté
Qui par euvre de charité
Et pour lonneur de sa personne
Vindrent a la feste a planté
Car c'estoit une belle aumosne

Entre icelles en congneuz une
Dont me prins a ymaginer
Quelle maleureuse fortune
Avoit l'amant la fait donner
Et qui m'en fist souspeçonner
Fut qu'elle estoit vestue de dueil
Et que sans partir ne tourner
Elle avoit sur luy tousjours l'ueil

Helas elle eust beaucoup mielx fait
Se durant la prosperité
Elle eust de quelque bien parfait
Le povre homme reconforté
Car lors avoit perdu santé
Et le veu de l'ordre entrepris
Rien n'y valloit la voulenté
Le conseil en estoit ja prins

Plusieurs de ces dames la vis
Qui de l'ordre cy caquetoient
Bien a leur aise et a devis
Et des religieux qui y estoient
Disant que telz gens sy mettoient
Povres amoureux aux a patis
Et que se plus mes caquetoient
Ilz en feroient grant abatis

Les unes mauvais cordeliers
Les appelloient par desplaisance
En disant d'eulx maulx a milliers
Par dieu se j'avoye puissance
Se disoit une et habondance
D'enfans sy ung n'en auroit pas
Brief elle perdoit pacience
De l'amant qui passoit le pas

Chascun et chascune disoit
Des biens de luy moult largement
N'a nulles des dames plaisoit
Qui se rendist aucunement
Ains maudissoient tresaprement
ceulx qui l'avoient mis en ces termes
Et en veis une soudainement
Plourer des yeux a grosses larmes

Ceste la souvent lamentot
En ramentevant la grant chiere
Ou autresfoys trouvee s'estoit
Son maintien sa doulce maniere
Et comme des bons la baniere
Par ses biens fais devoye porter
Dont l'en avoit du mal arriere
Tant que l'on povoit supporter

Las il estoit sy amiable
Se disoit l'autre ma cousine
Tant doux tant humble tant amiable
Et de trop plus grant bien digne
Quant il m'en souvient je m'en signe
Je n'eusse sceu veoir son party
Que cueur ou tant de bien l'on fine
Eust esté sy tost amorty

Or est il du monde aboly
Ne sçay ou le mal luy tenoit
Mais son sens avoit trop failly
Car quant le bien sy luy venoit
Et qu'amours se determinoit
Le compencer du temps passé
Dont aux dames bien souvenoit
Il a a leur service faulcé

Las il advient communement
Que telz gens qui sont ordonnés
A faire des biens largement
Aux dames a qui sont donnés
Se sont les premiers obstinez
A eux rendre a ung hermitaige
Mais ceulx par qui la sont menés
En deveroient porter le dommaige

Ainsi l'un a l'autre en passant
Sy en disoit sa ratelee
Voire d'un langaige perçant
Aussy agu q'une galee
Dont l'ordre estoit bien ravalee
En la blasmant en mainte sorte
Le long du chemin et alee
Et y furent jusques a la porte

Or le jeu fut a la ouvrer
Car a l'entree doibt on savoir
Que femmes ne s'osent trouver
En la religion pour veoir
Fors pour leurs parens recevoir
Et sy en fault c'est chose vraye
Du souz prieur congié avoir
Que l'on appelle rabat joye

Si que les parens et amis
Pour les femmes licence obtindrent
Que n'eusse leans le pié mis
Que vi cordeliers qui vindrent
Tost au devant d'eux et les prindrent
Deux a d'eux chascun par les mains
Et au monstier grant temps les tindrent
En parlant de dieu et des sains

Après quant ilz furent las d'estre
En l'eglise et au parlouer
Ils les menerent veoir le cloistre
Et de la aussy au dortouer
Puis ilz vindrent au refretouer
Plain d'imaiges en pourtraiture
Ou avoit sur le dreçouer
Une grande mort en painture

Sy en a en la compaignie
Qui leurs parens vous demanderent
Ce qu'on ne leur octroya mye
Ains les freres leur refuserent
Mais pour eulx sauver remonstrerent
Qu'ilz estoient lors en oraison
Et a tant la nuyt s'en allerent
Chascun gesir en sa maison

Lendemain qu'il estoit dimenche
Que l'en devoit faire la feste
Dont chascun de voulenté franche
A l'eglise venir s'apreste
Sy eussiés ouy grant tempeste
Et veu tant de gens pourmener
Qui rompoient au prestre la teste
A peine s'y povoit on tourner

Assez tost la messe chanter
Fist l'en ou il eut grant mistere
En laquelle devés noter
Que l'amant en ung oratoire
Estoit la tendu de soye noire
Ouvré aparans fleurs d'acolies
Puis sur luy avoit ung suaire
Tout couvert de merencolies

Après ceste grant messe dicte
Damp prieur sy le vint querir
Portant en sa main l'eaue beniste
Comme pour le mener mourir
Et gens au devant de courir
Pour veoir la maniere du fait
Mais il sembloit qu'il deust perir
Tant estoit ja mort et deffait

Tout le nez blanc comme salpestre
Avoit et le vis deschiré
N'ame si ne l'eust sceu congnoistre
Qui ne s'en fust bien près tiré
Brief estoit bien fort empiré
Car n'avoit membre sur le corps
Qui ne fust tout desfiguré
Et les yeux tous batus et mors

De la fut mené en chapitre
Habillié tressauvagement
D'une fraquonne a façon de mistre
Et le surplus du vestement
Estoit de blanc entierement
A grandes manches a goutieres
Bien saint et cueilly proprement
Devant coqueluchon derriere

Puis au chapitre le suivirent
Tous les gens de sa parenté
Ou deux cordeliers les assirent
Chascun selon sa dignité
Les freres estoient d'un costé
Les parens et parentes d'autre
Voire en sy grande quantité
Que l'en ne veoit l'un pour l'autre

La fut le povre amant assis
Tout seul apart sus une selle
Ou moins regart fut lors assis
Des ungs et d'autres a merveille
Dont y eut a l'assemblee telle
Qui sans faire grant mouvement
En gratant souvent son oreille
Et en plourant mout tendrement

Quant damp prieur fut en sa chaire
Devant tous se print a prescher
Des grans biens du monde et de l'aise
Qui y fait les gens trebucher
Et comment la mort sans huchier
Vient acoup sans heure certaine
Que après lever il fault coucher
Pour monstrer que tout vient a peine

En oultre prescha des doulours
Qui vient de joye transitoire
Mais il ne parla point d'amours
Aumoins dont j'en aye memoire
Aussi n'en avoit l'en que faire
Consideré l'adversité
Ains valloit mielx beaucop se taire
Car peut estre qu'on eust tout gasté

Assez le sermon sy dura
Pendant lequel une foys loyel
De la main vers celle tira
Qui pour luy sy menoit grant dueil
Puis fist semblant d'avoir sommeil
Baissant la teste pas a pas
Toutesfoys en devint vermeil
Et sy croys qu'il n'y pençoit pas

Après ce service finé
Damp prieur la fist apporter
Ung vueil habit de gris tanné
Qu'on doibt selon l'ordre porter
D'autre part fist l'abit bouter
Que l'amant au monde vestoit
En commençant a l'ennorter
De dire auquel il s'arrestoit

Vous avés dist il liberté
Aage parfait et congnoissance
Vecy l'abit de vanité
Vecy celluy de penitance
L'un tire a dueil l'autre a plaisance
D'un bien de l'autre mal aurés
Se tandis qu'avés la puissance
Prenés lequel que vous vouldrés

Lors dist par sa dure responce
Je vueil la vie du cordelier
A cestuy du monde je y renonce
Sans jamais plus m'en habiller
Sique on le fist desabiller
Tout nud et la devant tant dieux
Pour le vestir en cordelier
Et ainsy fut religieux

Quant tous les hommes et les femmes
Le veirent tout nud despouiller
Des yeux jecterent grosses larmes
Assés pour ung jardin mouiller
Esvanouyr et petiller
En eussiés veu qui est grant chose
Et tant que pour les resveiller
Il couvint troys sextiers d'eau roze

Ne a peine croiré je jamais
Que se cordelier fust rendu
Eust veu le piteux entremés
Ou l'oeil sur l'une est estandu
Que son cueur ne luy fust fendu
En plus de deux mille parties
Et qu'il n'eust cy prins cy pendu
Jeté la son froc aux orties

Sa dame sy faisoit semblant
D'assés tost le dueil en passer
Mais lors une fievre tremblant
La vint de sy près embrasser
Que a terre la fist renverser
Tant fut la fievre forte et aigre
Par quoy la fallut deslasser
Chauffer et froter de vin aigre

Tout le monde après se leva
Pour a la rescousse venir
Et sy remede on y trouva
Fors qu'on fist a elle venir
Le cordelier pour luy tenir
La teste et bailler du triacle
Qui luy fist son cueur revenir
Et dist on que ce fut miracle

Mais ainsi qu'on la delaissoit
Illec tumba de son secours
Ou des manches de son corset
Ung cueur d'or esmaillé de plours
A elle baillié par amours
Du temps qu'avoit le vent au popre
Dont l'amant sy eut grant douleur
Et l'en veit l'en batre sa couppe

Les autres pour leur mal couvrir
A force leur cueur retenoient
Passans temps a clorre et l'ouvrir
Les heures qu'en leurs mains tenoient
Dont souvent les fueilles tournoient
En signe de devocion
Mais les deulz et pleurs que menoient
Monstroient bien leur affection

Or après ses misteres fais
Se povre amoureux vint requerre
A damp prieur d'estre profais
Soy jectant a ses piés a terre
Sy que damp prieur envoye querre
Le livre des veux qui fault lire
En luy commençant de cest erre
Telz motz et parolles luy dire

Tout le premier veu ordinaire
De ceans est obedience
L'autre povreté voluntaire
Dont viennent junes et penitance
Pour vertus avons pacience
Et chasteté qui est la plus haulte
Sy jurés a vostre consience
De les garder sans point de faulte

Aussy vous faites veu a dieu
Que a l'ordre vivrés et mourrés
Sans jamais partir de ce lieu
Sinon quant le bissac porterés
Et quant pour le couvent yrés
Querir l'aumosne et pourveance
Ne q'un pas oultre passerés
Se n'avés congié et licence

Item qu'en chemin ou voyage
Vous ne chanterés ne rirés
Que quant d'aventure au passage
Une femme rencontrerés
En l'oeil ne la regarderez
Ne luy ferés chiere ou feste
Ains bien tost vos yeux clignerés
En baissant vers terre la teste

Item qu'en prin temps nouvellet
Quant par boys ou champs passerés
Des que orez le rossignolet
Vos vigilles de mors dirés
Et que jamais ne dormirés
Soubz aubespin n'esglantiers
Autre part tant que vous vouldrés
Pourveu qu'il n'y ait des rosiers

Item s'en allant avés fain
Cuillir pourrés parmy les trailles
Pour menger avec vostre pain
Des franboises ou des prunelles
Pourpié persin lectues nouvelles
De quoy vous remplirés vos bouges
Et d'autres verdures ytelles
Excepté de groiselles rouges

Item qu'en logis de plaisance
Sur vostre vie n'aviserés
N'en lieu ou ait feste ou dance
Ains bien loing de la tirerés
Que quant menesteriés vous orrez
fleutes doucines ou vielles
Vous grain ne les escouterez
Mais metrés vos dois aux oreilles

Item qu'en passant par les rues
En rien ne vous amuserés
A veoir les dames bien vestues
Ainçoys comme feu les fuyrés
Que d'amours plus ne parlerés
Ne de telles folies mondaines
Que vert ne vermeil porterés
Bouqués roses ne marjolaines

Item quant serés invité
De disner en lieu ou en place
Vous pour le benedicité
Dirés a chascun prou vous face
Et s'estiés aussy froit que glace
Au feu ne vous bouterés
Ne pour signe de joye qu'on face
Vous ne vous en amourerés

De ce qui sera au disner
Vous pourrés hardiment taster
En gardant vostre oeil de tourner
Trop avant et de caqueter
Car l'en ne se peut mielx gaster
Vers femmes que de telz aveaux
Et aussy de trop fort bouter
Les piés par dessus les terteaux

Je ne dy pas se d'aventure
Vostre cousteau cheoit a terre
Que vous ne peussés a ceste heure
Bien vous baisser pour l'aler querre
Mais gardés comme feu de feurre
De pincer ne de tatonner
Car vous priés de ceste erre
In pace pour vos jours finer

Item vos mains ne torcherés
A ses deliés serviettes
Ne qu'en bien ne toucherés
De la matiere d'amourettes
Et se sur table y a violettes
Ne vous joués pas a les prendre
Ains pensés que sont joyes infaites
Et que deviendrons tous en cendre

Et quant ce viendra au lever
Que l'en met dedens ces chofrettes
Pour en amours cueurs eslever
Armeries sentiers violettes
Le signe de la croix lors faictes
Frappant la main contre le pis
Et cueillés toutes les miettes
Pour donner aux povres a l'uys

Item que plus ne manirés
Or argent monnoye ne vaisselle
Ne de telz biens riens ne prendrés
Soit de bourgoises ou damoiselles
Amy la rigle sy est telle
En convent n'avons que les vivres
Et acquerir robe cotelle
Lumiere feu chaussure livres

Encore nous est deffendu
D'autre nouvel habillement
Jusques le nostre soit fendu
De toutes pars entierement
Et sy ne fine aucunement
Que les plis soient cueillis tous drois
Ne l'abit fait joyeusement
Ains rondement en tous endrois

Outre on vous deffend par exprès
De ne prendre nulle chemise
Sentant muglias ou cyprès
Ne blanche que de grosse frise
Bordés a soye ne a devise
Esguillette ferree d'argent
Ne autre nouvelle exquise
Pour devenir plus gué ne gent

Aussy laisserés habillemens
Qui font l'omme droit comme ligne
Car devons a nos vestemens
Par derriere avoir une vigne
Les soliers persés sans empegne
Deux grosses boucles fermans
Porter bas cheveux sur le pigne
Sans jamais les faire en alemant

Item jurés semblablement
Que ne prendrés dons ne baguettes
Nouveaux a esjouissement
Sur saincte perse violette
Lassees a fleurs de violettes
Bourses de perles enlassees
Cordons a boutons d'amourettes
Ou soupirs de menues pencees

Item mouchoers deliés
Chenettes a fleurs d'oubliance
Gorgias trop menuz ploies
Pignes dorés a esperance
Les cuevrechiés de plaisance
Car prendre point ne les devés
Aneaux ou verges d'aliance
Ou fut escript mon cueur avez

En oultre nous est deffendu
De ne porter manches petites
Grans bonnetz sur le hault verdu
Chausses de mygraine eslite
Pourpoins taillés a marguerite
Ne de menger plaisant viande
Ne aussi succre de troys cuites
Sur peine de paier l'amende

Item vous avés a garder
De ses deux yeux tous fretillans
Que ses dames pour esclandrer
Font estre tousjours assaillans
Et dont les plus fors et vaillans
Sy y perdent l'entendement
Car ilz trenchent a deux taillans
Et tirent a eulx liement

Il y a des yeux d'autre façon
Doux yeux qui tousjours vont et viennent
Doux yeux eschauffans le peliçon
De ceulx qui amoureux deviennent
Doux yeux qui revont et reviennent
Doux yeux avançant la colee
Doux yeux qui boivent et retiennent
Et sy baillent bont et volee

Doux yeux reluisans comme asur
Qui sont perilleux et dangereux
Doux yeux tirans huille de mur
Dont souvent povres amoureux
Seuffrent mains tourmens doloreux
Sans en oser monstrer semblant
Doux yeux farouches et paoureux
Qui donnent la fievre tremblant

Doux yeux moitié blans moitié vers
Pour consoler et amortir
Doux yeux qui jectent de travers
Pour guerir ung amant martir
Doux yeux qui poingnent sans sentir
Doux yeux de piteux entremés
Qui font semblant de departir
Et sy ne bougent jamais

Doux yeux a xxv caras
Doux yeux a cler esperlissans
Qui dient c'est fait quant tu vouldras
A ceulx qui sentent bien puissans
Doux yeux en l'air resplendissans
Que chascun ainsi doibt bien craindre
Car ilz ardent tant sont glissans
Quant vous les cuiderés estaindre

Doux yeux renversés a grant haste
Doux yeux soubz rians aux estoilles
Qui dient c'est fait quant tu vouldras
Et faisant bater aux corneilles
Doux yeux jectans fermes oreilles
Qui font gallans nuyt et jour courre
Et entrer es feves nouvelles
Qui ne chiesent pas pour escourre

Il y a doux yeux d'autre sorte
Qui sont petillans et gingans
Dont compaignons portent la bote
Et changent souvent nouveaux gans
Telz gens servent a estringans
Ou a mignons dorelotés
Et les font tenir sy fringans
Qui n'ont garde d'estre crotés

Doux yeux indes esmerillons
Doux yeux empanés de saietes
Aussi safre que barbillons
Qui font marcher sus espinettes
Et gallans aller a mussettes
Soit a geler a pierres fendant
Baiser les huys et les cliquettes
Pour les dames qui sont dedens

Doux yeux de joye et de soulas
Doux yeux tournans comme la lune
Dont les plus huppés crient helas
Sy ne fournissent de peccune
Avaler leur fault ceste prune
Et font telz yeux rire et gemir
Ceulx qui tiennent telle fortune
Sy ont beau loisir de dormir

Doux yeux rians par bas et hault
Ruans a destre et a senestre
Qui volent sur ung escherfault
Et par ses treilles et fenestres
Il n'y a jacobin ne prestre
S'il en a ung ris a demy
Qu'il n'en perde maintien et estre
Tant en sera lors mon amy

Doux yeux aussy vers que genesvre
Couvers de hayes et de buissons
Qui font gallans gauger le poevre
Et entrer en fortes frissons
Ceulx qui ont au cueur telz glaçons
Combien qu'ilz soient fort engelés
S'ilz n'ont garde que leurs chaussons
Passent par dessus leurs suliers

Item doux yeux frans et nays
Qui par dessus leur gorgerettes
Tirent une lieue de pays
Et sont plus picquans que languettes
Ilz envoient ung homme braies nettes
Quant le trait est menu plié
Il n'y a coffre ne layettes
Qui trestout ne soit desplié

Doux yeux singlans et desvoyés
Qui jectent ung maintien sauvaige
Dont communement vous voyés
Ses povres varletz de village
Porter dessoubz leurs bras la targe
Ou ung bouquet a la sainture
Et puis sauter a l'avantaige
Ilz ont bon temps mais qu'il leur dure

Doux yeux traversans et courans
Doux yeux enferre et empenne
Qui prennent gens aux las courans
En portant creance par signe
Il n'est personne estrange ou fine
Qu'il ne face aprivoiser
Car ilz sont de la vielle myne
Ilz vallent ung demy baisier

Item doux yeux pipesonnes
Ruans tousjours en ceste poste
Qui envoye galans aux mirouers
Pour veoir derriere leur cote
C'elle est nestoiee ou bien se porte
Et puis se monstrent de rue en rue
Pour leur dame qui fait la morte
Tire toy arriere moreau rue

Doux yeux pour festes et dimenches
Doux yeux blans et riquanerés
Qui font vestir habis estranges
A ses varletz dimencherés
Et porter cordons fringuerés
Mon dieu qui sont embesongniés
Et les verrés rire aux paroys
Pour leurs cheveux qui sont pignés

Doux yeux marchans sur le duret
Qui portent mors a patenostre
Et ceulx la dient adieu fleuret
Laissés les aller ilz sont nostres
L'en en use qu'au jour d'apostre
Brief les gallans qui en sont ferus
Pevent bien dire leur patenostre
Car jamais ne sont secourus

Doux yeux a lorenge d'ortie
Doux yeux qui pleurent et soupirent
Doux yeux qui sourient sans partie
Qui plus avant vont plus empirent
De ce dont les compaignons tirent
Auffort sy fait leur cueuvrecchief
Que souventesfoys les dessirent
Tant seuffrent peine et meschief

Doux yeux precieux et bigotz
Aians cours parmy ses monstiers
Qui font dancer sur les ergos
Et courir plus dru que trotiés
En ouvrant heures et sautiers
Telz yeux percent les vestemens
Et ce fait vers les benestiers
Gare derriere pour les alemans

Doux yeux qui jectent eau par feu
Doux yeux atrayans et fetis
Doux yeux veyans de place en lieu
Dont sont prins les povres chetifs
Et d'autres yeux supellatifs
Que vous tousjours escheverés
Et renvoyerés in remotis
Ou vostre ordre transgresserés

Item s'en une hostellerie
Pour loger vous fault transporter
S'il y a feste ou mommerie
Trop bien vous y pourrés bouter
Mais se voyés grain s'acouter
Le varlet et la chamberiere
Fuyés vous en sans arrester
Par l'uys de devant ou derriere

Encore quant il adviendra
Que dueil et paix y trouverés
Coucher tout seul y couviendra
En ung galetas ou yrés
Et la a terre dormirés
Estandu comme une escrepvisse
Ne a vostre lit souffrerés
Approcher fille ne nourrisse

Item s'en venant de quester
trouvés bourgoises ou damoiselles
Qui n'ait ame pour la monter
A cheval dont prier vous vueille
Affin que point ne se travellie
A deux mains l'alés embrasser
En tenant l'estrier et la s'elle
Mais gardés bien de la blesser

Et se son fouet chiet a terre
Ou qu'il soit en chemin perdu
Fuyés hastivement le querre
Sans estre effrayé ny perdu
Et combien que soit temps perdu
Sy fault il aux dames complaire
Car le loier en est rendu
Et viennent les biens de leur plaire

Des gens a tant mal gracieux
Qu'il n'en deigneroit reculer
Ne a peine pas tourner les yeux
Tant vont les femmes ravaler
Mais ne sont dignes d'y parler
On leur doit dire a leur museau
Rien rien quand les verrés filler
Levés leur tousjours leur fuseau

Cela en arriere ou avant
Trop n'est pas prejudiciable
Car autant en emporte le vent
Et sy est euvre cheritable
Aussy fault estre amiable
Quant l'aumosne leur requerrés
Combien que le moins convenable
Est le mieux quant vous pourrés

Et se une trouvés sy hardie
Qu'elle vous requist de l'assoudre
Ou lasser sa cote hardie
Ne vous joués a l'estandre
Trop bien cueillir ou ses plois joindre
Pourrés et torcher son patin
Mais gardés en cueillant de attaindre
Ne de point toucher le tetin

Frere ne vous y joués pas
Car sans quelque compassion
Lors vous faudroit passer le pas
Et souffrir mort et passion
Ne point n'aurés remission
Pour ung sy grant cas perpetrer
Ains acoup sans confession
L'en vous feroit lors degrader

Item au soir après souper
Qu'on s'ebat a maintes façons
Pour le temps en bien ocuper
Vous recoudrés vos peliçons
Et estudirés les leçons
Qu'il fauldra chanter a matines
Ne n'yrés vers prez ne buissons
Baver ne trainer vos botines

Item et sy ne jourés
Au siron ne a glinettes
Au jeu de mon amour aurés
A la queuleuleu ou aux billettes
Au tiers au perier aux bichettes
A gecter au sain et au dos l'erbe
Au propos pour dire sornettes
Ne que paist on ne que paist herbe

Item s'on dance au chapellet
Troys a troys ou a dance ronde
Mettés a vos yeux ung volet
Pour fouyr ceste joye du monde
Et de la troys lieux en la ronde
Allez vous en boire et menger
Car en lieu ou telle joye habonde
Ne se fait pas bon heberger

Item devés savoir beau sire
Que amours a excommeniés
Tous ceulx qui dancent le doux pere
Comme maudis et regniés
Car la sont trop apleniés
Baiser est vendu a vil pris
Dont les verrés bien manier
Et en rendront ce qu'ilz ont prins

Ne suffist il pas dea de dire
Que se n'est q'un esbatement
Ou l'en dance sans point mesdire
Car il y a double embrassement
Et sy baise l'on trop longuement
La faulx amans ont leur fortune
Mais les loyaulx n'ont que tourment
Et sy fault qu'en portent la prune

Item se allés sus acouchees
Ne vous aprouchés près des baings
Ains des que verrés ces trenchees
De fleurs roumarins aubefoings
Serrés tant que pourrés les poings
Et pencés lors a paradis
En disant las a jointes mains
Pour les mors ung de profundis

Et se par force ou par contrainte
Pour baigner vous font despouiller
La corde contre la chair sainte
Ayés tousjours sans deslier
Ne m'alez point l'eau brouller
Fleurer les bouqués des poupines
Saillir taster ne chatouiller
Ne baiser entre ces courtines

Vela les veux de l'observance
Frere que avés affaire
Ne n'est sy bonne penitance
Que de se garder de mal faire
Par quoy pour mielx y satisfaire
Laisser fault toutes vanités
Sy jurés d'iceulx parfaire
Et ainsy vous le promettés

Lors se povre amant tout moullié
De pleurs fist les veux et promessez
Illec estant agenouillié
Sa bouche contre terre verse
En grant dueil et en grant detresse
Comme povés presupposer
Puis vint en signe de leesse
Tous les religieux baiser

Et pour l'oster de vaine gloire
Et qu'il n'eust l'oeil au monde ouvert
Damp prieur a son gré fist faire
Ung champ de roumarin vert
Lequel de feu ardant couvert
Devant ses yeux le espandi
Voiés dist il la fumee part
Sic transsit gloria mundi

Or pencés quelz piteux revers
Quelz ennuys quelz gemissemens
Quelz biens mondains mys a l'envers
Quelz durs evanouissemens
Quelz pleurs quel esbahissement
Et quelles destresses la furent
Sy m'esbahy veu les tourmens
Que aucuns de dueil n'en moururent

A tant fut mys sans sainture
Le povre homme en une salette
Qui n'est trop clere ne obscure
Ou après la procession faicte
Se lieu s'appelloit la chambrette
De dieu a y faire les dons
Ou la maintes gens de la feste
Firent illec de tresbeaux dons

Illec vindrent seurs et cousines
Oncles nepveux freres bel antes
Dames bourgoises et voisines
Amys amyes parens parentes
Et autres maintes femmes gentes
Qui a ce cordelier pour voir
De donner estoient mout ardantes
Et en firent moult leur devoir

Entre les autres y veis
Dont l'une donna ung breviaire
Et l'autre ung galice a devis
Et sa dame une cordeliere
Pour luy faire une troussouere
Mais par ce que dessus la houpe
Sy avoit du vert et non guere
Damp prieur par despit la coupe

Helas quelle erreur quelle pitié
Ou sont amours qui ne fendirent
Lors cest hostel par la moitié
Et que la vengance n'en firent
Les dons fais les gens s'en partirent
Car chascun estoit travaillé
Et pour disner se retrahirent
Et sur ce point je m'esveillé

Qui fut lors bien esperdu
Se fut moy je vous en assure
Car sicomme tout fust fondu
La ne veis corps de creature
Mont ne maison ne couverture
Chamberiere ne bastouer
Sy ay escript a l'aventure
Par maniere de me jouer

De tous les amoureux martirs
Transis banis et doloreux
N'en veis nulz tant estre amortis
Comme se povre malheureux
Telz gens sont mal amoureux
N'en leur cueur espoir n'abonde
Combien qu'on tient cil tant heureux
qu'il ne vouldroit pas vivre au monde

Sy vous prie mes treschieres dames
Qui vous plaise de souvenir
De l'amant qui rendit les armes
Pour bon cordelier devenir
Et que pour l'ordre maintenir
L'aumosne aux freres espandés
Ou au moins qu'au temps advenir
Les ayez pour recommandés

Plusieurs gens envoient a romme
Qui a leur huys ont le pardon
Il n'est loyer que de povre homme
Ne charité que de pur don
Ayez mes dames pitié don
Des amoureux de l'observance
Car ilz ont trespiteux gardon
Dieu leur doint bonne pascience

The Project Gutenberg eBook of L'amant rendu cordelier a l'observance d'amour

S'ensuyt l'amant rendu cordelier a l'observance d'amours

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur

L'amant

Damp prieur